Ўтган ўйин

Про-лига 2021
24.03.2021
«Динамо»
«Динамо» стадиони
2:1

СУПЕРЛИГА - 2019

Жамоа Ў Т-Н О
1 Пахтакор 26 75-18 69
2 Локомотив 26 39-16 49
3 Бунёдкор 26 37-33 43
4 Сўғдиёна 26 29-29 40
5 Металлург 26 32-25 35
6 Сурхон 26 26-33 35
7 Насаф 26 34-27 33
8 Навбаҳор 26 26-23 32
9 АГМК 26 36-37 32
10 Андижон 26 23-37 28
11 Қўқон-1912 26 31-45 26
12 Бухоро 26 18-37 24
13 Динамо 26 25-47 24
14 Қизилқум 26 24-48 24

СУПЕРЛИГА - 2019

26-тур Металлург 2-0 Сурхон
26-тур Бухоро 2-1 АГМК
26-тур Қўқон-1912 1-1 Навбаҳор
26-тур Насаф 1-2 Динамо
26-тур Андижон 1-0 Қизилқум
26-тур Локомотив 0-0 Пахтакор
26-тур Бунёдкор 2-2 Сўғдиёна
25-тур Сўғдиёна 1-1 Насаф

Тўпурарлар

Қадамбой Нурметов 5 (0)
Амиржон Сафаров 2 (0)

Тугилган кунлар

Янгиликлар » Про-Лига

Ҳаким Фузайлов: «Динамо» менга бегона эмаслиги ва жамоани Суперлигага қайтариш мақсадида Самарқандга қайтдим»

Рукн: Янгиликлар » Про-Лига

Куни кеча «Динамо» жамоаси қароргоҳида клуб раҳбарияти иштирокида йиғилиш ўтказилиб, тожикистонлик таниқли мураббий Ҳаким Фузайлов «Динамо» жамоаси бош мураббийи сифатида таништирилди. Узоқ йиллардан кейин Самарқанд клубида яна иш бошлаган Ҳаким Қаюмович билан учрашиб, «Динамо» олдига қўйилган мақсад ва вазифалар, мураббийнинг 2000-йилларда Олий лигадаги фаолияти ҳақида суҳбатлашдик.

- Ҳаким Қаюмович, қарийб 20 йиллик танаффусдан кейин сизни Самарқандда кўриб турганимиздан хурсандмиз. Аввало, «Динамо»дан тушган таклиф ҳақида гапириб берсангиз...

- Авваламбор, мен ҳам Самарқанддек қадимий ва ажойиб шаҳарга яна қайтганимдан жуда ҳам хурсандман. Самарқанддек катта вилоят ва шаҳарнинг бош жамоаси «Динамо»ни бошқариш мен учун катта шараф. Сабаби бу жамоанинг катта тарихга эга эканлигини жуда яхши биламан. Сўнгги мавсумда Тожикистоннинг «Хўжанд» клубида фаолият юритдим ва йил якунида жамоа билан чемпионатда 2-ўринни эгаллаб, ОФК Кубоги мусобақасига йўлланма олгандик. Бу йил ҳам келишувни узайтириш масаласи турганди. Аммо бир неча кун олдин Самарқанддан қўнғироқ бўлиб, «Динамо» раҳбариятидан таклиф олдим. Ўзбекистонга қайтиш масаласини узоқ ўйлаб ўтирганим йўқ. Клуб билан бир йиллик шартнома имзоладик. Қўйилган вазифани бажарсак, мавсум якунида келишув узайтирилади.

- «Динамо»нинг сўнгги мавсумда Суперлигага чиқа олмай, Про лигада қолганидан хабарингиз бор. Бунгача асосан Олий лигаларда ишлаган мутахассис сифатида айтингчи, бу таклифни қабул қилишингизга энг муҳим жиҳат нима бўлди?

- Албатта, клубнинг вазиятидан хабардорман. Ҳар ҳолда Ўзбекистонда кўп йиллар ишлаганим туфайли бу мамлакат чемпионатини ҳам кузатиб келаман. Бунгача асосан юқори лигаларда ишлаган мураббийнинг қуйи лигада фаолият бошлаши кўпчиликни ажаблантириши мумкин. «Динамо»га келишимнинг энг асосий сабаби, бу жамоа менга бегона эмаслиги, мураббийлик фаолиятимдаги дастлабки қадамларни айнан Самарқандда ташлаганим ва Ўзбекистондаги энг яхши натижаларимдан бири билан ҳам айнан «Динамо» билан эришганим муҳим ўрин тутди. Клуб раҳбарияти билан гаплашганимда жамоа олдидаги вазифа Суперлигага чиқиш эканлиги мени бу ерда иш бошлашимга сабаб бўлди. Ҳар ҳолда Самарқанддек катта вилоят ва қадимий шаҳар жамоаси фақат Суперлигада бўлиши керак.

Умуман олганда, Ўзбекистон чемпионатига қайтишни истадим. 2012-2014 йиллар давомида Тошкентнинг «Локомотив» клуби бош мураббийи сифатида совринли ўринларни эгаллагандик. Унгача Россиянинг «Локомотив» Москва, «Ростов», «Терек» клубларида, кейин эса 2016-2018 йилларда Тожикистон миллий жамоаси ва Душанбенинг кўп карра чемпиони «Истиқлол» жамоаси бош мураббийи сифатида ишладим. Йиллар ўтиб, яна Ўзбекистонга қайтганимдан хурсандман.

- «Хўжанд» клуби билан сўнгги мавсумда Тожикистон Олий лигаси кумуш медалига эга чиқиб, ОФК Кубогига йўлланма олган эдингиз. Бу жамоани тарк этиш осон бўлмагандир?

- Самарқанддан таклиф тушгач, Хўжанд клуби раҳбарияти билан гаплашиб олдим ва улар менинг қароримга ҳурмат билан муносабатда бўлиб, ўзаро дўстона хайрлашдик. Янги мавсумда ҳам катта мақсадларни кўзлаган собиқ жамоамга омад ва зафарлар тилаб қоламан.

- «Динамо»да ишга киришганингизга кўп бўлмади, жамоа билан яқиндан танишаяпсиз. Сизнингча, жамоанинг ҳозирги потенциали қай даражада ва таркибда қандай ўзгаришлар кузатилиши мумкин?

- Жамоа билан бирга ҳали энди уч кун ишладим. Клубдаги маҳаллий мураббийлар ёрдам беришда давом этишади. Уларнинг аксари шогирдларим. Билишимча, ўтган йилги ўйинчилардан таркибни жуда кўп футболчилар тарк этган. Ҳозирда қўл остимда 30 нафарга яқин футболчи бўлса-да, таркибнинг жуда катта қисми ҳали тажрибага эга бўлмаган маҳаллий ёш футболчилар ва академия тарбияланувчилари. Яқин кунларгача уларнинг барчасига имконият бериб, кўрикдан ўтказамиз. Аммо клуб олдидаги вазифадан келиб чиқиб, жамоа таркиби кучайтирилиши шарт. Айнан ҳозирдан бошлаб, аллақачон таркибни кучайтириш масаласи билан шуғулланишни бошладик. Таркибимизга легионерларни ҳам чақиришимиз мумкин. Чунки натижага эришиш учун ёрдам берадиган маҳоратли футболчилар бизга жуда зарур. Яқин 10 кун ичида таркибни шакллантириб, қандай ўйинчилар билан ишлашим борасида аниқ тасаввур уйғониши лозим.

- Жамоанинг дастлабки режаларни тузишга улгурдингизми?

- Албатта, бу борада узоқ ўйлашга вақт бўлмайди. Тайёргарлик масаласини раҳбарият билан муҳокама қилдик. Унга кўра, январь ойи якунига қадар тайёргарлик ишлари Самарқандда ўтказилади. Февралдан эса Тошкентда ўқув-машғулот йиғини ташкил этиб, асосан назорат баҳсларида майдонга тушамиз, таркибни кучайтирамиз.

- «Динамо»нинг Ўзбекистон чемпионати тарихидаги энг яхши натижаси айнан сизнинг қўл остингизда қўлга киритилгани, қолаверса янги бош мураббий сифатида самарқандлик минглаб мухлислар сиздан жамоани Суперлигага олиб чиқишингизни кутаётганлиги аниқ. 2000 йилги ва ҳозирги ташрифингизни таққослаб, қандай фарқларни кўрасиз?

- Самарқандга биринчи ва иккинчи марта иш бошлашим орасида 20 йиллик катта оралиқ бўлса-да, ўшанда ҳам, ҳозир ҳам олдимда асосий вазифа юқори ўринларни эгаллашдир. Кечагидек ёдимда, 1999 йилда «Динамо» бош мураббийи раҳматли Маҳмуд ака Раҳимов мени бирга ишлаш учун Самарқандга чақирганди. Ўшанда 2000 йилда бирга ишлашга ваъда бергандим. Аммо кўп ўтмай, 1999 йилнинг декабрь ойида Маҳмуд ака Раҳимов Тошкент – Самарқанд трассасида автоҳалокатга учраб, вафот этди. Унга ваъда бериб қўйганим учун мени Самарқандга чақириб бош мураббий сифатида тайинлашди. Клубга эътибор кучли эди. Маҳмуд ака Раҳимов «Динамо»да яхши жамоа шакллантириб бўлганди, мен эса жамоани яна бироз шакллантиргандим, холос. «Динамо» таркибида ўша даврнинг энг кучли футболчилари, миллий жамоа аъзолари йиғилганди. Самарқанд вилоят ҳокимияти ва мухлисларнинг қўллаб-қувватлашлари эвазига «Динамо» ҳеч кимдан қўрқмайдиган жамоага айланганди. Ўзбекистон кубоги финалида «Дўстлик» жамоасига қарши майдонга тушгандик, Осиё кубок эгалари кубогида иштирок этгандик. Мавсумни яхши бошлаган бўлсак-да, якунда 4-ўринни эгалладик. Билишимча, бу натижа «Динамо»нинг Олий лигадаги энг яхши натижаси бўлиб қолмоқда. Ўшанда Самарқанддаги ҳар бир ўйинимиз шаҳарда мухлисларнинг байрамона атмосферасига сабаб бўларди, ҳар ўйинда 20-30 минг томошабин стадионни тўлдириб ўтирарди. Ҳозиргача ўша даврларни эслаш ёқимли.

Бу йил ҳам жамоа ўзи иштирок этадиган турнирда ғолиблик учун тўп суриши вазифаси қўйилган. Раҳбарият ва самарқандлик мухлисларнинг қўллаб-қувватлашлари остида «Динамо»нинг аввалги мавқейини тиклашга бор куч ва тажрибамни ишга солиб, клубни Суперлигага олиб чиқишга интиламиз.

Усмон Ибодов суҳбатлашди.

Ўқилди (марта): 390. Киритилган сана: 2021-01-18 17:00:00.

Навбатдаги ўйин

Про-лига 2021
30.03.2021
«Динамо»
«Истиқлол» стадиони
18:00

Фото-галерея

Чимёнда тайёргарлик
Константин Мандриченко
Динамо - Насаф 1:2. Убайдулла Набиев, 2016 йил.
Сурхон - Динамо 1:0 / Суперлига-2019, 2-тур.

Сўровнома

ҲОЗИРЧА СЎРОВНОМА ЎТКАЗИЛМАЯПТИ.
Сўровномалар архиви

Хабарлар лентаси

05.09 «Бухоро» - «Динамо». Кўҳна шаҳарлар жамоаларининг 48-тўқнашуви
12.08 Пешқадамлар тўқнашуви: «Динамо» «Нефтчи»нинг Фарғонадаги мағлубиятсиз сериясига чек қўя оладими?
05.05 59 йиллик рақибларнинг 50-тўқнашуви. «Динамо» - «Нефтчи» ўзаро ўйинлари тарихи, таркиблар трансфер баҳоси ва мураббийлар фикри
06.04 Ҳаким Фузайлов: «Динамо» ютган бўлса-да, очиғи ўйиндан қониқмадим»
05.04 «Динамо» «Орол» мағлуб этиб, пешқамликни сақлаб қолди
25.03 Фахриддин Алимов: «Мақсадим – Про лигада тўпурар бўлиш ва «Динамо» билан Суперлигага чиқиш»
25.03 Ҳаким Фузайлов: «Самарқанддаги ажойиб футбол атмосфераси ҳам сўнгги дақиқаларда ғалаба қозонишимизга ёрдам берди»
24.03 Мавсумни ғалаба билан бошладик
23.03 «Динамо» жамоаси таништирув маросимини ўтказди
14.03 «Олдимизга фақат битта мақсад қўйилган – Суперлигага чиқиш». «Динамо» клуби директори ва бош мураббийи мухлислар билан учрашди

Видео

UFF.UZ веб-студиясида яратилди.
© 2021. fcdinamo.uz
Барча ҳуқуқлар ҳимояланган.
Сайтдан маълумотлар олинганда fcdinamo.uz манзили манба сифатида кўрсатилиши шарт.