Равшан Аҳмедов: «Динамо» мағлубиятга муносиб эмасди, омад рақиб томонда бўлди»

Рукн: Янгиликлар » Про-Лига

Про-лига 2-тури доирасидаги «Динамо» - «Истиқлол» (1:2) учрашувидан кейин самарқандликлар бош мураббийи Равшан Аҳмедов ўйин борасида тўхталди.

«Очиғини айтсам, бугунги ўйинимиз менга ёқди. Чунки, аввалги ўйинларимизга нисбатан яхшироқ тўп сурдик. Бироқ ўз хатоларимиз эвазига аламли мағлубиятга учрадик. Футболда бунақаси учраб туради. Ҳаммасини кўрдинглар, изоҳсиз қолдирган бўлардим. Омадсизлик туфайли мағлуб бўлдик. Омад рақиб томонда бўлди.

Шунга қарамай, ўйинимиз ёмон чиқмаётганди, йигитларнинг ўйинидан қониқдим. Фақатгина якуний зарбаларни берадиган футболчи топилмади. Иккинчи бўлимда тўлиқ устунлик қилдик.

Ўйинимиз чиқмай мағлуб бўлганимизда ҳам майли эди, аммо тўлиқ устунлик қилиб, вазиятлар яратиб мағлуб бўлиш жуда аламли. Ўйин назорати бизнинг қўлимизда эди. Жамоа кўрсатган кўрсатмаларни аниқ бажарди, бунга эътирозим йўқ.

Асосий таркибимиздаги Алишер Юсупов ва Дамир Темировнинг майдонга тушмаганига сабаб, улар аввалги ўйинда жароҳат олишганди.

Кубок ва Про-лигадаги кетма-кет мағлубиятлар? Тўғри, чемпионатдаги кетма-кет икки учрашувда ҳам очколарни йўқотдик. Аммо бу ҳали старт, ҳеч нарса йўқотилгани йўқ. Олдиндаги ўйинлар билан вазиятни яхшилашимиз мумкин», - дея фикр билдирди «Динамо» бош мураббийи Равшан Аҳмедов.