Даврон Файзиев: «Пенальти белгиланганда ҳисоб бошқача ҳам бўлиши мумкин эди»

Рукн: Янгиликлар » Про-Лига

“Пахтакор” – “Динамо” учрашувидан сўнг “Динамо” бош мураббийи Даврон Файзиев ўйин ҳақида тўхталди.

- “Пахтакор” жамоасига муносиб қаршилик кўрсатиш ва улар билан тенгма-тенг ўйнай олишимизни кўрсатиш учун келгандик ва шундай ҳам бўлди. Лекин якунда рақиб ғалаба қозонди. Балки аксарият вазиятларда ташаббус “Пахтакор” тарафида бўлгандир, лекин бутун ўйин давомида биз ҳам муносиб ўйнашга интилдик. Фақат битта вазиятда йўл қўйилган эътиборсизлик оқибатида дастлабки голни ўтказиб юбордик ва шу якунда мағлубиятга олиб келди. Бу энди йигитлардаги тажриба билан боғлиқ. Самарқанддан келиб қўллаб-қувватлаган мухлисларимизга катта раҳмат дейман.

Белгиланмаган пенальти ҳақида нима дейишим мумкин? Иккинчи бўлимда 0:0 бўлиб турганда пенальти белгиланганда ҳисоб бошқача бўлиши ҳам мумкин эди. Бош ҳакам биздан яқинроқ эди. Видеотакрорни кўриб, кейин аниқ гап айтиш мумкин.

Бугун кўрдинглар, жамоамиз ўйинни чўзгани йўқ. Бу борада Арвеладзе ҳам менга вақтни чўзмай, курашувчан жамоа учун миннатдорчилик билдирди. Ўйинни чўзиш аввало менг ҳам, мухлисларга ҳам ёқмайди. Кучли рақиб олдида ҳам муносиб ҳимояланиб, қўрқмай қарши ҳужумларда тўп сурдик, аммо якуний зарбани беришда ҳали яхшироқ ишлашимиз лозимлиги кўриниб қолди.

Чинданам, Бобур Қосимов айтайлик “Машъал”да таянчда, “Сўғдиёна”да керак бўлса ҳимояда ёки қанотда тўп сурарди. “Динамо”да ҳам у универсал. Ҳозир бизга кўпроқ марказда тўп суриши зарур бўлаётгани учун таянчда тўп сурмоқда” – деди Даврон Файзиев.