ДАВРОН ФАЙЗИЕВ: «БИЗ ТАСЛИМ БЎЛМАЙ, ОХИРИГАЧА КУРАШАМИЗ»

Рукн: Янгиликлар » Про-Лига

«Динамо» - «Орол» (2:0) учрашувидан кейин Самарқанд жамоаси бош мураббийи Даврон Файзиев ўйин борасидаги фикрларини билдирди.

- Авваламбор, Про-Лигадаги дастлабки ғалаба билан барча мухлисларимизни табриклайман. Кўрганингиздек, бугунги ғалаба осон эмас, анча асабий руҳда қўлга киритилди. Асабий деганимга сабаб, вазиятлардан фойдаланиш бобида кўп имкониятларни кўкка совураяпмиз. Жуда асабийлашаётганим сабаби, футболчиларимиз ўз меҳнатлари қадрига етмай, шунча вазиятлардан бой беришмоқда. Вақт эса ўтмоқда, бизни оғир ўйинлар кутаяпти. Бугун ниманинг устидан ишлашимиз лозимлиги яна кўринди. Асосийси ғалабага эришдик, йигитларга раҳмат, умид қиламанки, омадсизлик ортда қолиб, бу муваффақиятлари ўйинларимизнинг бошланиши бўлиб хизмати қилади.

- Олдинда “Динамо”ни “Қизилқум”га қарши муҳим кубок учрашуви кутиб турибди. Бугун Миркомил Локаев, қолаверса яна қатор ҳимоячилар жароҳат олганлигини инобатга олсак, бу вазиятдан қандай чиқиб кетмоқчисиз?

- Афсуски, таркиб борасида муаммоларимиз бор. Айтганингиздек, айниқса ҳимоя чизиғи бошоғриқ бўлиб турибди. Умид қиламанки, Локаевнинг жароҳати жиддий бўлиб чиқмайди. Бунёд Исроилов ҳам “Қизилқум”га қарши ўйингача шай ҳолатда бўлиши керак. Қолган футболчиларимизнинг ҳам ўша ўйинга қадар бўлган ҳолатига катта эътибор берамиз. “Қизилқум” Суперлига сўнгги турида амалдаги чемпион “Локомотив”ни сафарда мағлуб этишига сал қолди. Бу ўйинда жамоанинг кучи яққол кўринди. Рақиб кучли футболчилар, яхши легионерларга эга бўлсада, “Динамо” осонлик билан таслим бўладиган жамоа эмас. Мухлисларимиз бизнинг 12-ўйинчимиздек қўллаб-қувватлашса, биз ҳар қандай ҳолатда ҳам ғалаба учун курашамиз.

Усмон ИБОДОВ ёзиб олди.