МУРАББИЙЛАР ҚАНДАЙ ФИКРДА?

Рукн: Янгиликлар » Про-Лига

«Олмалиқ» - «Динамо» (2:0) учрашувидан кейин жамоа бош мураббийлари ўйин борасида тўхталишди.

ВИКТОР КУМИКОВ: «БИЗ КУЧЛИ ЖАМОАНИ МАFЛУБ ЭТДИК»

- Ўйин оғир ўтишини жуда яхши билардик. Айниқса, ёмғирли ҳавода икки томонга ҳам осон бўлмади. Биз кучли жамоани мағлуб этдик. «Динамо» осонгина таслим бўладиган клуб эмас. Ниҳоят битта ўйинда иккита гол урганимиздан хурсандман. Кейинги баҳсларда ҳам шундай давом этишига умид қиламан. «Динамо» бежизга мавсумни ғалабалар билан бошламади, улар бир қатор ўйинларда кучли ўйин кўрсатишганди. Бизнинг асосий муаммо - вазиятлардан унумли фойдалана олмаслик. Бугун эса кўзлаган мақсадимизга етишдик. Четлатиш ва пенальти борасида гапириш менинг ваколатимга кирмайди.

ОЛЕГ ТЮЛЬКИН: «ОХИРИГАЧА КУРАШДИК, АММО…»

- Бугун фақат ғалабани кўзлагандик. Биринчи бўлимда ўйин тизгинини ўз қўлимизда сақладик, тенгкураш кузатилди. Иккинчи бўлим бошида стандарт вазиятдан сўнг гол ўтказиб юборганимиз режамизни ўзгартирган бўлсада, четлатиш ва пенальтидан кейин қийин аҳволда қолдик. Йигитларга эътирозим йўқ. Улар камчиликда қолишса ҳам охиригача курашишди, аммо вазиятни ўзгартира олмадик. Таркибимизда кўп жароҳат олган футболчилар бор. Қолаверса, бугун Шоҳруҳ Холматов ҳам қизил карточка олди. Кейинги баҳсларгача бу муаммоларни ҳал қилиб, таркибда кимни туширишни ўйлаб кўрамиз.

- Кубокдаги вазифа? Бизнинг мақсадимиз мухлисларни қувонтириш. Узоқ йўл босиб келиб, кучли ёмғирга қарамай бугун улар охиригача стадиондан бизни қўллаб туришди. Бундай мухлисларга раҳмат. Кубокда «Олмалиқ»ни мағлуб этишга ҳаракат қиламиз.

Усмон ИБОДОВ ёзиб олди.