КИМ ҚАНДАЙ ФИКРДА?

Рукн: Янгиликлар » Про-Лига

Учрашувдан кейин ҳар икки жамоа бош мураббийлари журналистлар саволларига жавоб қайтаришди.

Мурод Исмоилов, «Пахтакор» бош мураббийи:

- Кутилганидек Самарқанддаги учрашув ҳам биз учун оғир ўтди. Ушбу учрашувга катта тайёргарлик кўрган бўлсакда, барибир ўша олдинги муаммоимиз – вазиятлардан унумли фойдаланиш борасидаги кўрсатгичимизни тўғирлай олмадик. Бир қатор вазиятлар кўкка совурилди. Бу бизнинг «касаллик»имиз бўлиб қолмоқда. Шу боис, ўйин охирини жуда асабий ўтказдик. «Динамо» эса яратилган имкониятдан фойдалана олди. Умуман олганда эса, асосий мақсад уч очко қўлга киритилганидан хурсандман.

Равшан Ҳайдаров, «Динамо» бош мураббийи:

- Кетма-кет кучли клубларга қарши ўйинда тушаётганлигимиз жамоага ўз таъсирини ўтказмай қолмаяпти. Бугунги учрашувга яхши тайёргарлик кўргандик. Аммо, ҳозирда таркиб ва футболчилар савияси жиҳатдан рақибимиз «Пахтакор»нинг устунроқ эканлиги кўриниб қолди. Уларга қарши тўғри тактика танлагандик деб ҳисоблайман. Айнан қарши ҳужум эвазига ўйин охирида мувозанатни тиклагандик. Аммо, ўша голдан кейин жуда тез хотиржамликка берилдик ва бу учун жазоландик.