РАВШАН ҲАЙДАРОВ: «АСОСИЙСИ – САМАРҚАНДДА ЭЪТИБОР КУЧЛИ»

Рукн: Янгиликлар » Про-Лига

«Насаф» - «Динамо» (3:2) учрашуви якунига етгач, ҳар икки жамоа бош мураббийлари иштирокида матбуот анжумани ўтказилди. Дастлаб саволларга «Динамо» жамоаси бош мураббийи вазифасини бажарувчи Равшан Ҳайдаров жавоб берди.

- Орада вужудга келган танаффусдан фойдаланиб, «Насаф»га қарши ўйинга ҳар қачонгидан пухта тайёргарлик кўргандик. Ўйинда асосан ҳимояда ўйнаб, қарши ҳужум тактикасида ўйнамоқчи эдик. Бироқ, режамиз муваффақиятли амалга ошмади. Бунга таркибдаги муаммолар ҳам сабаб бўлди. Зеро, бугун ҳимоячилардан Александр Клецков дисквалификация туфайли, Аҳрол Рисқуллаев жароҳати сабабли, Нодир Санақулов эса ёшларимиз сафида Туркиядаги Жаҳон Чемпионатига йўл олгани боис айниқса ҳимоя чизиғида муаммоларимиз бор эди. Биринчи бўлимда ҳисобни тенглаштирдик, аммо бўлим сўнггида яна гол ўтказиб юбордик. Иккинчи бўлимда очко олиб кетиш учун ҳужумкорликка ҳам эътибор бердик, аммо, фақат яна битта гол билан чекландик, холос.

- «Динамо» жамоасини қийин аҳволда қабул қилдингиз. Клуб раҳбарияти томонидан жамоага қандай вазифа юклатилган?

- Вазифа – биринчи давра якунига қадар қўл остимиздаги йигитлар билан вазиятни ўнглашга интилиш. Асосан ёшларга эътибор бераяпмиз, уларга имкон бераяпмиз. Ҳозирга келиб, Комил Шарофутдинов, Абдулло Набиев, Нодир Санақулов, Фирдавс Абдусалимов каби ҳали энди 20 ёшни қарши олаётган ёшларимизда ўсиш яққол кўринмоқда. Давралар оралиғида таркибни янада кучайтириб, ҳозирги вазиятни ўнглаймиз деб ўйлайман.

- Сиз молиявий жиҳатдан ёмон салоҳиётга эга бўлмаган «Қизилқум»ни тарк этиб, «Динамо»га ўтдингиз. Буни нима билан изоҳлаган бўлардингиз?

- Биринчидан, муаммосиз жамоанинг ўзи йўқ. Иккинчидан, молиявий жиҳатдан «Қизилқум» ва «Динамо»ни солиштирмаган бўлардим. Зарафшонда молиявий ҳолатимиз яхши эмасди, эътибор ҳам шу даражада эди. Шу боис, олдинги йилги таркибдан 11 нафар футболчи «Қизилқум»ни тарк этганди. Самарқандда эса, энг асосийси – жамоага нисбатан эътибор кучли. Молиявий жиҳатдан етакчи бўлмасакда, клубнинг таъминоти ўз вақтида барқарор амалга оширилади. Яъни, «Динамо» моддий жиҳатдан барқарор жамоа.