СЕРГЕЙ КОВШОВ: «ФУТБОЛЧИЛАР ЎЙИНИДАН ҚОНИҚДИМ»

Рукн: Янгиликлар » Олий лига

Меҳмонлар мураббийидан кейин, «Динамо» катта мураббийи Сергей Ковшовнинг фикри билан қизиқдик. «Афсуски, сўнгги дақиқаларда киритилган гол бизни яна очкодан маҳрум этди» - дея гап бошлади «Динамо» устози.

- Бугун мухлисларимиз қаршисида тўп суриб, ишқибозларимизга қувонч улашмоқчи эдик. Қолаверса, турнир жавдалидаги ҳолатимиз бизнинг рақибимиз ким бўлишидан қатъий назар фақат ғалаба қозонишимиз лозимлигини кўрсатарди. Шогирдларим ўйинидан қониқмадим, дея олмайман. Улар «Насаф»га қаршилик қилиш учун бор куч ва ғайратларини ишга солишди. Айрим вазиятларда ҳакам рақиб фойдасига хатолар қилди. Сўнгги сонияларда эса тўп ўтказиб юбордик.

- Жамоа мана икки ўйин – «Пахтакор» ва «Насаф» сингари кучли жамоаларга қарши сизнинг қўл остингизда майдонга тушмоқда. Тан олиш керак, ҳар икки ўйинда мағлубиятга учралган бўлсада, жамоа ўйинида ўзгариш бор. Бунга қандай қилиб эришдингиз?

- Ўзгариш бўлиши керак эди, йигитлар ҳам барчасини яхши тушуниб туришганди. «Насаф» ва «Пахтакор» бугунги кунда мамлакатимизнинг энг кучли клубларидандир, биз эса айни дамда кутилган ўринда эмасмиз. Бироқ, шунга қарамай ҳар икки гранд жамоага қарши йигитларни тайёрлашга ҳаракат қилдик, улар ёмон ўйнашгани йўқ. «Пахтакор»да ҳам ҳисобда олдинга чиқиб олган эдик, аммо хатолар бизни мағлубиятга етаклади. «Насаф»га қарши ҳам камида дурангга лойиқ эдик, аммо сўнгги дақиқадаги ҳакам ва бизнинг хатомиз рақибларга қўл келди.