ХАТОЛАР ЎЗ СЎЗИНИ АЙТГАНДА...

Рукн: Янгиликлар » Про-Лига

Азалий рақиблар ҳисобланмиш Тошкентнинг «Пахтакор» ва Самарқанднинг «Динамо» жамоалари ўртасидаги баҳс ҳар қачонгидан ҳам қизиқарли ва шиддатли ўтди.

Маълум сабабларга кўра, пойтахтда жамоамизни бош мураббий ёрдамчиси Сергей Ковшов туширди. Ўйиндан бир кун олдин Олимпия терма жамоамиз ўзининг назорат учрашувини ўтказганлиги боис, ҳар икки жамоа ҳам «олимпиячи»ларисиз ҳаракат қилди. Учрашув мезбонлар ҳужумлари остида бошланган бўлсада, динамочилар қарши ҳужум тактикасида тўп суришди. Бу эса ўз самарасини узоқ куттиргани йўқ. Учрашувнинг 19-дақиқасида ўнг қанотдан ҳужум бошлаган Шерзод Зайниев тўпни Юрий Романюкка етказиб берди. Молдовалик легионернинг ўнг қанотдан узатиб берган тўпини эса Виктор Клишин ҳимоячилардан баланд сакраб, Темур Жўраев дарвозасига киритди. Бу Клишиннинг мавсумдаги илк голи бўлди, 0:1.

Голдан руҳланган меҳмонлар ўйиндаги услубни ўзгартирмай, қарши ҳужумда рақибни «пойлади»лар. Натижада 22-дақиқада Сергей Грибанов ҳисобдаги фарқни иккитага етказиши мумкин эди. Аммо Зайниевнинг тўп оширишидан сўнг, украиналик ҳужумчи яқин масофадан кучли зарба йўллай олмади. Ҳужумга ўтган мезбонлар кўп ўтмай мувозанатни тиклашди. Тошкентликлар ҳужуми вақтида ҳимоячимиз Девид Ония тўп учун кураш вақтида рақибига қўполлик ишлатди, дея топган бухоролик ёш ҳакам жарима майдони ташқарисидан жарима зарбасини белгилади. Санъат Шиховнинг узоқ юқори бурчакка йўллаган зарбасини эса бу сафар ҳам Сафонов қайтара олмади. Бу гол Евгенийнинг мана шундай жарима зарбаларидан ўтказган мавсумдаги тўртинчи голи бўлди, 1:1. Бўлим ушбу натижа билан якунланди.

Иккинчи бўлим ҳам кутилганидек майдон эгаларининг ҳужумлари билан бошланди. Кўп ўтмай эса, дарвозабоннинг яна бир хатоси мезбонларнинг голи билан интиҳо топди. Шиховнинг унча кучли бўлмаган зарбасини қайтаришда хатога йўл қўйган Сафонов, тўпга ташланишда ҳам сусткашликка йўл қўйди ва тўпга эгалик қилган Савич жамоасини ҳисобда олдинга олиб чиқди, 2:1.

Голдан кейин самарқандлик футболчилар вазиятни яна ўнглаш учун бир қатор имкониятларга эга бўлишди. Жумладан, шу куни анча фаол тўп сурган Шерзод Зайниев, Умед Абдураҳмоновларга ҳисобни тенглаштириш учун имкониятлар бўлганди. 70-дақиқада Виктор Клишин ўйиндаги «дубли»ни нишонлашга яқин турганди. Аммо, ҳужумчимиз тўп узатилган вазиятда ҳимоячилар билан бир чизиқда турган бўлсада, қанот ҳаками Клишиннинг голини инобатга олмади.

Ўйин якунланиши арафасида «Динамо» жарима майдони олдидан ҳимоячиларимиз тушунарсиз хатоларга йўл қўя бошлашди. Дастлаб, Ониянинг хатосидан мезбонлар фойдалана олмаган бўлса, 85-дақиқада Учқун Қобиловнинг хатосидан сўнг «Пахтакор» тўпурари Душан Савич осонлик билан ўйиндаги учинчи голни киритиб учрашув натижасига ойдинлик киритди. Бу вазиятда заҳирадан майдонга тушган дарвозабон Азиз Ашуров ҳам ёрдам бера олмади, 3:1.

Тошкент. 1565 томошабин.

«Пахтакор» – «Динамо» 3:1 (1:1)

Ҳакамлар: И.Танташев – 8,3; О.Жумаев – 8,9; Р.Самандаров – 8,4; И.Гармашов - 9.

Голлар: С.Шихов (25), Д.Савич (51, 85) – В.Клишин (19).

«Пахтакор»: Т.Жўраев, И.Суюнов, А.Холмуродов, К.Тожиев, М.Холмуҳаммедов, Д.Шарофутдинов (Б.Миладинович, 68), К.Махарадзе, В.Козак, С.Андреев, С.Шихов (А.Азизов, 73), Д.Савич (А.Абдуллаев, 90+3).

«Динамо»: Е.Сафонов (А.Ашуров, 54), Д.Ония, Ш.Зайниев (А.Бозоров, 73), У.Абдураҳмонов, Ю.Романюк, У.Қобилов, С.Сайфиев (С.Ғаффоров, 76), Д.Усмонов, Т.Қобилов, С.Грибанов, В.Клишин.

Огоҳлантиришлар: А.Холмуродов (10), К.Тожиев (47), К.Махарадзе (68) – В.Клишин (70), С.Грибанов (75).

Назоратчи: И.Нехочин.

Энг яхши ўйинчилар: Д.Савич – В.Клишин.