ВИКТОР ЖАЛИЛОВ: «ЎЙИН ДУРАНГГА МОС БЎЛДИ»

Рукн: Янгиликлар » Про-Лига

Меҳмонлар устози Анатолий Демьяненкодан сўнг, «Динамо» янги бош мураббий Виктор Жалилов ўз бошқарувидаги илк ўйини таасуротларини баён этди.

- «Насаф»га қарши ўйин қийин ўтиши аниқ эди. Чунки, Қарши жамоаси анча кучли таркибга эга эканлиги, мураббийлар штаби ҳам юқори малакали мутахасислардан иборат эканлиги жамоа ўйинидан кўриниб турибди. Фикримча бугунги ўйиндаги дуранг бизнинг жамоамиздек, рақибларимизни ҳам қониқтирган бўлиши аниқ. Чунки, ўйин дурангга мос бўлди. Агарда қайсидир жамоа ғалаба тўпини киритганида, рақиб учун аламли мағлубият бўларди. Шундай экан, ҳар икки жамоа ҳам ҳақли равишда бир очкодан олишди.

- Жамоангиз ўйинидан қониқдингизми?

- Мени қувонтиргани шогирдларимнинг майдонда бор куч ва маҳоратларини ишга солганлари бўлди. Майдондаги ҳар бир футболчи шунчаки югургани ёки ўз имкониятларидан паст даражада ҳаракат қилгани йўқ. Футболчиларга бу борада эътирозларим йўқ. Тўғри, голли имкониятларимиз кўп бўлди, аммо ўша вазиятларда рақибларимиз ҳам яхши ўйнашди.

- «Насаф»га қарши баҳс Самарқанд жамоасидаги илк учрашувингиз бўлди. Бу борада таасуротларингиз қандай?

- Фикрларим ижобий. Жамоани қабул қилиб олганимга икки кун бўлди. Бундай қисқа муддат ичида жамоада кескин бурилишни амалга ошириш, футболчиларни тайёрлаш қийин. Ҳали қайси футболчи қандай имкониятларга эга, бунинг ҳаммаси менга маълум эмас. Бу ерда ишлаш учун барча имкониятлар бор, шундай экан биз жамоа билан ишлаб муваффақият сари одимлашимиз даркор. Ўйлайманки, мен жамоа футболчилари билан янада яхши танишиб чиқаман. Олдинда бизни бешта муҳим учрашув кутиб турибди. Чемпионатдаги бу ўйинларга пухта тайёргарлик кўриб, жамоа мавқеини кўтаришимиз керак.