ЖАЪФАР ИРИСМЕТОВ: «ФАҚАТ ҒАЛАБА ҚАНОАТЛАНТИРАДИ»

Рукн: Янгиликлар » Олий лига

17-турнинг қизиқарли ва шиддатли ўтиши кутилаётган учрашувларидан бири Наманган шаҳрида ўтказилади. Шу куни мезбон «Навбаҳор» ўз майдонида «Динамо» жамоасини қабул қилади. Мухлисларда катта қизиқиш уйғотган учрашувдан олдин биз «Динамо» ҳужумчиси Жаъфар Ирисметовнинг ўйин олди ҳақидаги фикрлари билан қизиқдик.

- «Намангандаги баҳс ҳар икки жамоа учун ҳам жуда муҳим», - дея гап бошлади тажрибали ҳужумчи.

- «Боиси, майдон эгалари «Навбаҳор» ҳам биз ҳам сўнгги ўйинларда ғалаба нима эканлигини билмаяпмиз. Қолаверса, биз ҳозирча сафардан очко олганимизча йўқ. Турнир жадвалидаги ҳолат ҳам ҳар икки жамоага ҳам фақат очко олишни тақозо қилади. Зеро, кейинги ўйинларда ҳар икки жамоани кучли рақиблар кутиб турибди. Шундай экан, ҳар бир очконинг қадри баланд ҳозир», - дейди Жаъфар Ирисметов.

Ўйин олдидан футболчи фикр билдираркан, «Динамо» футболчилари Наманганда фақат ғалабани кўзлаётганлигини эътироф этди.

- «Ўйлайманки, биз бу ўйинга етарлича тайёргарлик кўра олдик. Энди, ҳар қанча қийин ва оғир бўлмасин Наманганда бор маҳорат ва кучимизни ишга солиб муваффақият қозонишимиз шарт. «Навбаҳор» билан ўйинда фақат ғалаба қаноатлантиради».

Кўпчилик мухлисларнинг хабари бўлса керак, муқаддас Рамазон ойида Олий лигада тўп сураётган бир нечта футболчилар ҳам рўза тутишади. Шундай футболчилардан бири бу Жаъфар Ирисметовдир. 34 ёшли ҳужумчининг айтишича, у ўйин бўладиган кундан ташқари бошқа кунларда рўза тутишни канда қилмайди.

- «Албатта, муқаддас Рамазон ойи вақтида рўза тутишни канда қилмасликка ҳаракат қиламан. Рўза тутишлигим машғулотлар вақтида менга салбий таъсир қилмайди. Фақатгина ўйин бўладиган куни клубнинг кунлик тартиби бўйича рўза тутишга рухсат йўқ», - дейди Жаъфар.

Шу ўринда айтиш лозимки, Ирисметов «Динамо» сафида бугунги рақиб «Навбаҳор» дарвозасини сўнгги маротаба 11 йил олдин, 1999 йилги мавсумда ишғол этганди. Бугун ҳам ҳужумчимиз ва жамоамизга омад тилаб қоламиз.