ЎРИНБОСАРЛАРИМИЗ «ҲОКИМ КУБОГИ»ДА МУВАФФАҚИЯТЛИ ИШТИРОК ЭТИШМОҚДА !

Рукн: Янгиликлар » Ўринбосарлар

Февраль ойининг иккинчи кунидан бошлаб Самарқандда янги футбол мавсумига старт берилди. Вилоятимиз ҳамда қўшни вилоят футбол жамоаларидан иборат 28 жамоа анъанавий тарзда ўтказилиб келинаётган «Ҳоким Кубоги» учун курашни бошлади.

Саккиз гуруҳга бўлинган 28 жамоа ҳозирда гуруҳ босқич учрашувларини якунига етказишмоқда. Вилоятимизнинг бир қатор жамоалари қатори, «Динамо» ўринбосарлари ҳам «Ҳоким Кубоги»да иштирок этиб, ғолиблик учун курашишмоқда.

Мусобақанинг «D» гуруҳидан ўрин олган жамоамиз ёшлари барча ўйинларни кўтаринки руҳда ўтказишмоқда. Дастлабки баҳсни Ургут тумани жамоасига қарши ўтказган ёш динамочилар йирик 6:0 ҳисобда зафар қучишди. Гуруҳдаги иккинчи учрашув эса жорий йилдан бошлаб Биринчи лигада ўз иштирокини бошлайдиган «Регистон-S» клубига қарши ўтказилди. Жуда шиддатли ва кескин курашга бой ўтган ўйинда «Динамо» ўринбосарлари ҳамшаҳарларини кичик 2:1 ҳисобида мағлуб этишди. Учинчи турда эса Тайлоқ тумани футболчиларига қарши саф тортишган самарқандлик футболчилар бу ўйинда ҳам рақибларига ҳеч қандай имконият қолдиришмади, 8:2.

Гуруҳ босқичини юз фоизлик натижа билан якунлаб, нимчорак финалга йўлланмасини қўлга киритган ўринбосарларимиз ушбу босқичда Фарҳод шаҳарчасининг «Фарҳод» жамоасига қарши ўйин ўтказишди. Вакилларимизнинг тўлиқ устунлигида ўтган ўйинда йирик 7:1 ҳисоби қайд этилди ва «Динамо» ўринбосарлари чорак финал масаласини ҳал этишди. Футболчиларимизнинг рақиблари шанба куни аниқланади ва чорак финал баҳси 7 февраль куни ўтказилади. Мусобақа ғолиблиги учун курашаётган жамоамизга бу йўлда омад тилаб қоламиз.

«Ҳоким Кубоги», «D» гуруҳи.

1-тур. «Динамо» - Ургут – 6:0

2-тур. «Регистон-S» - «Динамо» - 1:2

3-тур. «Динамо» - Тайлоқ – 8:2

Нимчорак учрашуви.

«Динамо» - «Фарҳод» - 7:1

Чорак финал. 7 февраль.