Терма жамоамизнинг Жаҳон чемпионати саралаш босқичида иштирок этаётганлиги боис, айни дамда миллий чемпионатимизда кичик танаффус юзага келган. Ушбу қисқа вақтдан фойдаланиб «Динамо» чемпионатнинг қолган қисмига тайёргарликка зўр берган.
26 августдан 30 августга қадар Тошкентда тайёргарлик кўрган Аҳмад Убайдуллаев жамоаси уч кунлик дам олишдан сўнг Самарқандда тўпланишди. Ҳозирда жамоа кунига икки маҳалдан машғулотлар ўтказмоқда. Жума кунидан бошланган йиғинда барча футболчилар иштирок этишмоқда. Юқори кайфиятда ўтаётган машқлар давомида кузатдикки, ҳеч бир футболчини жароҳат безовта қилмаяпти.
Эслатиб ўтамиз, «Динамо» ўзининг навбатдаги учрашувини 9 сентябрь куни 19-тур доирасида Самарқандда Фарғонанинг «Нефтчи» жамоасига қарши ўтказади. 20-турда ҳам жамоамиз ўз майдонида ҳаракат қилиб, 17 сентябрь куни «Шўртан» жамоаси билан куч синашади. |