НЎЪМОН ҲАСАНОВ: «ҒАЛАБА УЧУН КЕЛГАНДИК, АММО…»

Рукн: Янгиликлар » Про-Лига

«Динамо» - «Қўқон-1912» (0:0) учрашувидан кейин меҳмонлар бош мураббийи Нўъмон Ҳасанов журналистлар саволларига жавоб қайтарди.

- Самарқандда яхши кайфиятда келиб, ғалаба билан қайтмоқчи эдик. Бугун ҳар икки жамоа шиддатли ўйин кўрсатишга интилишди. Биз ҳар доим ғалаба учун майдонга тушамиз. Шунинг учун бугун икки очко йўқотдик дейишим мумкин. Бугун ҳар икки жамоа ҳам борини бериб ўйнади. Аммо, натижа адолатли бўлди деб ўйлайман. Яъни, Учрашув дурангга мос равишда кечди. Ҳар икки жамоада голга тортадиган вазиятлар содир бўлди. Мақсадимиз тўп ўтказиб юбормасдан битта гол уриш эди. Аммо бироз ўхшамай қолди. Ўзи негадир футболчиларимиз ўз майдонимизда бошқача, меҳмонда бошқача ўйин кўрсатишмоқда. Мана, «Динамо» ҳам мухлислари қаршисида яхши ўйин намойиш этди. Жамоамизда молиявий томондан камчиликларимиз йўқ. Клуб раҳбариятига бу борада ўз миннатдорчилигимни изҳор этаман.

Мавсум бошида жамоа олдига яхши ўйин кўрсатиб мухлисларимизни хурсанд қилиш мақсади қўйилган эди. Ҳамон ўша мақсадимиз ўзгаришсиз қолди. Айнан қайсидир ўринни эгаллашдек мақсад қўйилмаган. Иккинчи давра арафасида жамоамизга тўрт нафар янги футболчиларни олгандик. Уларнинг барчаси менинг ишончларимни оқлашмоқда. Янги ўйинчиларимиз бизнинг оиламизга киришиб кетишди. “Қўқон-1912” жамоасини бир оила деб аташ мумкин. Вақт ўтгани сари ўйинимиз янада кучайиб боришига шубҳам йўқ. «Динамо»га кейинги ўйинларда омад тилайман. Самарқандда яхши жамоа шаклланган.