ТАЧМУРОД АГАМУРОДОВ: «БИЗ БИР ЖАМОАДАН, БИР ОИЛАГА АЙЛАНДИК»

Рукн: Янгиликлар » Олий лига

«Динамо» - «Сўғдиёна» (2:0) учрашувидан кейин мезбон жамоа бош мураббийи Тачмурод Агамуродов журналистлар саволларига жавоб қайтарди.

- Бугунги баҳс ҳар икки жамоа учун жуда муҳим эди. Шу боис ҳар икки томон ҳам фақат ғалабани кўзлади. Сўнгги ўйинларда жамоанинг ўзига бўлган ишончи ортаётгани бугун ўз сўзини айтди. Йигитлар ишончли ғалабага эришишди. Бугун жуда чиройли ўйин кўрсатган бўлмаслигимиз мумкин, аммо ўйиндаги шиддат ва уч очко хурсанд қилади. Мухлисларимиз ажойиб қўллаб-қувватлашди, улар бундай ғалабага муносиблар.

- Ушбу ўйинни кўпчилик «Динамо»нинг мавсумдаги энг яхши ўйини дея баҳоламоқда. Бу борада сизнинг фикрингиз қандай?

- Менимча, «Локомотив»га қарши кечган баҳсда анча мазмунли ва чиройли ўйин кўрсатган эдик. Гарча кичик ҳисобда мағлуб бўлган бўлсакда, «Локо»га қарши ўйинни алоҳида кўрсатган бўлардим.

- «Дубль»га эришган Азиз Ибрагимов сиздан миннатдор эканлигини айтди. Сиз унинг ўйинни қандай баҳолайсиз?

- Мен нафақат Азизни, балки бутун жамоани тилга олган бўлардим. Шогирдларим ҳаракатидан тўла қониқдим. Йигитларимиз кўрсатмаларни тўлиқ бажаришди. Умуман олганда, ҳозирда менинг қўл остимда ажойиб якдил жамоа шаклланганлигидан хурсандман. «Динамо» жамоадан, бир оилага айланди.

- Александр Болиян ва Константин Мандриченко сингари легионерларнинг таркибда йўқлиги нима билан боғлиқ?

- ПФЛга бадал пули борасида ҳисоб-китобимиз якунланмаган. Шу боис бу футболчиларнинг лицензияси берилмаяпти. Керакли маблағни тўлиқ ўтказиб бўлсак, лицензия қайтарилади.

- «Динамо»ни кейинги ўйинларда «Бунёдкор», «Пахтакор» ва «Насаф»га қарши учрашувлар кутиб турибди. Имкониятлар сизнинг наздингизда қандай?

- Бу йилги чемпионатда кутилмаган натижалар қайд этилади ва қайд этилмоқда. Олий Лигада кучсиз ва яққол аутсайдер жамоанинг ўзи йўқ. Ҳар қайси жамоа омади келса пешқадамни мағлуб эта олади. Биз тайёргарликка зўр берамиз ва умид қиламанки кучли жамоаларга қарши ўз сўзимизни айта оламиз.