МАВСУМДАГИ ИККИНЧИ ҒАЛАБА

Рукн: Янгиликлар » Про-Лига

Кутилганидек «Динамо» ва «Машъал» жамоалари ўртасидаги бу сафарги қарама-қаршилик ҳам ҳар йилгидек анча шиддаткор, курашларга бой руҳда ўтди.

Мавсумнинг бошланиш қисмида «Динамо» жамоаси кучли рақибларга дуч келиб мухлисларни қувонтира олмаганига қарамай, самарқандлик футболчилар сўнгги турда Андижондан йирик ҳисобдаги ғалаба билан қайтишганди. Айнан ушбу ғалаба мухлисларни яна Самарқанддаги марказий ўйингоҳ томон етаклади. Ўн мингдан ортиқ мухлислар қўллаб-қувватлаши остида мамлакатимизнинг биринчи рақамли ҳаками Равшан Эрматов ҳуштаги билан бошлаган баҳснинг бошланиши етарлича осуда кечди. Ҳар икки томоннинг ўзига хос «разведка»ларидан сўнггина жамоалар навбати билан ҳужумга ўтишди. Ўз уйида ўтган ўйинлардан фарқли равишда шу куни икки ҳужумчи Иван Нагаев ва Рўзим Ахмедовлар тандемига имконият берган мураббийлар бу борада тўғри қарор қабул қилишганлиги ҳужумчиларнинг ҳаракатида акс этарди. Учрашувнинг 10-дақиқасида Нагаев-Ахмедов комбинациясидан сўнг Леонид Кошелев чамаси 20 метрлардан зарба йўллаб Санжар Қувватовни синовдан ўтказди. Қолаверса бўлим сўнггига қадар Иван Нагаев ва Рўзим Ахмедов, меҳмонлардан эса Самандар Шодмонов хавфли вазиятни юзага келтиришди.

Иккинчи бўлим мезбонларнинг ҳужумлари остида бошланди. 48-дақиқада самарқандлик ҳимоячи Салим Мустафоев майдон марказида тўпни қабул қилиб, жарима майдони сари интилди ва Иван Нагаев билан «девор» услубида ўйнаб кучли зарба йўллади. Ўз ўрнида яна бир собиқ олимпиячи Санжар Қувватов ҳам зарбага монанд равишда чиройли «сейв» орқали ҳужумни бартараф этди. Майдон эгаларининг ҳужумга ўтиб кетишларидан фойдаланмоқчи бўлган Самандар Шодмонов 51-дақиқада «Динамо» дарвозабони билан деярли бирга-бир вазиятда қолганди, лекин ҳужумни ҳимоячилар бузишди.

Ўйиндаги бурилиш даври, 62-дақиқада Суннатилла Мамадалиевнинг заҳирадан ўйинга қўшилгани бўлди. Айнан ушбу яримҳимоячи майдонга туширилгач, динамочилар майдон марказида тўлиқ устунликка эга бўлишди ва ҳужумлар сони ҳам кўпайди. Баҳснинг 74-дақиқасида айнан Мамадалиев Нагаевнинг тезлик билан олдинга интилаётганлигини кўриб жарима майдони сари тўпни оширди. Тезлик бобида муборакликлар ҳимоячиси Дилявер Ваниевни ортда қолдирган ҳужумчи жарима майдонида ҳимоячи томонидан тўхтатилди ва Равшан Эрматов 11 метрлик нуқтани кўрсатди. Тўпга яқинлашган Кошелев ўзининг ва жамоанинг Самарқанддаги дастлабки голини киритди, 1:0.

Ушбу голдан руҳланган мезбонлар ҳужумлар «ёмғири»ни тўхтатишмади. Майдон марказидаги Мамадалиев ва Кошелевнинг фаоллиги натижасида 81-дақиқада ҳисобдаги фарқ оширилди. Суннатилла томонидан етказиб берилган тўпдан сўнг, Рўзим Аҳмедов бу сафар ҳам тезлик бобида муборакликларнинг финландиялик ҳимоячиси Тони Линдбергни ортда қолдириб яккама-якка вазиятда Қувватовга имконият қолдирмади, 2:0. Ушбу натижа эса «Машъал»нинг кетма-кет олтинчи йил Самарқанддан ғалабасиз қайтишини таъминларди.

«ДИНАМО» – «МАШЪАЛ» - 2:0

Самарқанд, 10 522 томошабин.

Ҳакамлар: Р. Эрматов (Тошкент), А. Расулов (Тошкент), Д. Саидов (Тошкент), М. Муҳаммедов (Тошкент вилояти).

Голлар: Л. Кошелев (74, пенальти), Р. Аҳмедов (81).

«Динамо»: А.Мельничук, А.Хвостунов, А.Рисқуллаев, А.Ерохин, Ж.Отақулов, С.Мустафоев, Д.Жўраев (С.Мамадалиев, 61), Ж.Бобоев (У.Абдураҳмонов, 88), Л.Кошелев, Р.Ахмедов (З.Полвонов, 86), И.Нагаев.

«Машъал»: С.Қувватов, Д.Ваниев, Т.Линдберг, И.Фомичев, А.Хайдаров, Э.Эргашев, Г.Сапаргалиев (Ш.Шайманов, 85), Т.Дадашев (Б.Давлатов, 78), М.Ғафуров (Ш.Файзиев, 85), И.Петкович, С.Шодмонов.

Огоҳлантиришлар: Д. Жўраев (35) – А. Ҳайдаров (15), Г. Сапаргалиев (50), Д. Ваниев (74).

Назоратчи: А. Попов (Тошкент).

Энг яхши ўйинчилар: И. Нагаев – С. Шодмонов.