ДЕЯН ЖУРЖЕВИЧ: «ҒАЛАБА ЖУДА МУҲИМ ЭДИ»

Рукн: Янгиликлар » Про-Лига

«Динамо» ва «Пахтакор» (0:1) ўртасидаги учрашув якунлангач ҳар икки жамоа мураббийлари иштирокида матбуот анжумани ўтказилди. Дастлаб журналистлар саволларига меҳмонлар бош мураббийи Деян Журжевич жавоб берди.

«Бугун Самарқандга фақат ғалаба илинжида келган эдик. Эътибор бераётган бўлсангиз ўйиндан-ўйинга ўйинимиз ҳам натижаларимиз ҳам яхшиланиб бормоқда. Биз ҳали яна ўсишда давом этамиз. Биринчи бўлимда ўйинимиз унчалик чиқмади. Бироқ иккинчи бўлимда рақибнинг заиф нуқталарига қараб, керакли ўзгартиришларни амалга оширдик ва ўйин тўлиқ ташаббусимиз остида ўтди. Натижада ҳисобда олдинга чиқиб, ғалабани қўлга киритдик» - дейди «Пахтакор» бош мураббийи.

«Динамо» жамоаси ҳақида ҳам фикрларим ижобий. Самарқандликлар бугун етарлича қаршилик кўрсатишди. Футболчилар кейинги ўйинларида мухлисларини хурсанд этишларига ишонаман».

«Ҳозирда «Пахтакор» таркибида майдонга тушишга тайёр бўлган 22 нафар футболчи бор. Биз вазиятларга қараб уларнинг хизматларидан фойдаланамиз. Албатта, ким яхши спорт формасида бўлса, асосий таркибга киритилади. Чемпионлар лигасида ҳам гуруҳдан чиқиш учун имкониятларимиз етарли. Фақатгина биз ўз ўйинларимизни кўрсатсак бас», - дея фикрини якунлади бош мураббий.