ВЛАДИМИР ФОМИЧЕВ: «ДИНАМО» АНЧА КУЧАЙГАН»

Рукн: Янгиликлар » Про-Лига

«Динамо» - «Машъал» (2:0) учрашуви якунлангач, ҳар икки жамоа мураббийлари ўйин борасида фикр билдиришди. Дастлаб, меҳмонлар устози баҳс борасида тўхталаркан, ҳакамнинг хатоларига урғу берди.

Владимир Фомичёв («Машъал» бош мураббийи):

- «Учрашув жанговар тарзда ўтди. «Динамо»дан шундай кучли ўйин кутгандик. Афсуски, ҳакамларнинг айрим тушунарсиз қарорлари баҳсга салбий таъсир кўрсатди. Тўғри, шогирдларимдан Мадиёр Мўминов жамоани қийин аҳволга солиб қўйди. Унинг ҳаракатларини умуман оқламайман. Бир киши кам бўлиб тўп суриш ҳеч қачон осон кечмаган. Бу сафар ҳам шундай бўлди ва биз мағлубиятдан қочиб қутулолмадик. Қолаверса, ҳакамнинг футболчиларимизга қатор сариқ карточкаларни бериши оқибатида кейинги турда «Шўртан»га қарши қайси футболчини ҳам туширишни билмайман. Умуман олганда «Динамо» ҳозирда анча кучайган. Сўзим исботи сифатида самарқандликларнинг сўнгги ўйинлардаги муваффақиятини келтиришим мумкин» - дейди муборакликлар устози.