ВИКТОР ЖАЛИЛОВ: «РУҲИЙ ТУШКУНЛИКНИ ЙЎҚОТИШГА ЭРИШДИК»

Рукн: Янгиликлар » Про-Лига

Матбуот анжуманининг иккинчи қисмида мезбонлар мураббийи Виктор Жалилов йиғилганлар саволлларига жавоб қайтарди.

- Албатта, ғалаба қозониш ҳар доим ёқимли. Мухлислар сингари бутун жамоанинг ҳам кайфияти кўтарилди. Жамоадаги руҳий тушкунликни ҳам йўқотишга эришдик деб ўйлайман. Ҳар қалай бугун осон бўлмаган учрашувда ўз майдонимиздаги илк гол ва дастлабки муваффақиятга эришдик. Йигитлар ҳам биринчи бўлимдаги кўрсатмаларни тўлиқ бажаришди ва айтиш керак бугун бизга омад ҳам кулиб боқди. Умуман олганда 2-3 жамоадан ташқари, бошқа барча жамоаларнинг кучлари деярли тенг. Бунга мисол «Андижон» турнир жадвалида 5-ўринда бораётган биз эса, сўнгги поғонани банд этгандик. Ўйин ҳисоби эса умуман бошқа натижани кўрсатмоқда. Тенгкучли жамоалар баҳсларида ҳали кўп кутилмаган ҳисоблар қайд этилса керак.

- Фарғонадаги учрашувда бўлгани каби, бугун ҳам асосий ҳужумчи Виктор Клишин ҳатто ўйин қайдномасида ҳам йўқ?

- Водийдаги сўнгги ўйинимиз олдидан Клишин жароҳат олди. Шу боис у майдонга туша олмаяпти. Секин-аста ҳужумчимиз сафга қайтади.

- Кейинги турдаги «Қизилқум»га қарши учрашувдан олдинги фикрларингиз?

- Жадвалдиги ҳолатимиз айни дамда фақат ғалаба қозонишни тадбиқ этади. Шундай экан Зарафшондаги ўйинга пухта ҳозирликни эртаданоқ бошлаймиз.