ИЛҲОМ ЮНУСОВ: «САМАРҚАНД ЖАМОАСИ ЮҚОРИ ЎРИНЛАРГА МУНОСИБ»

Рукн: Янгиликлар » Клуб хабарлари

Давралар оралиғида Қаршининг «Насаф» клубидан «Динамо» сафига ўтган Илҳом Юнусов клубимиз билан шартномага имзо чеккач, тажрибали яримҳимоячининг жамоамизга қайтиши борасида қизиқдик.

«Динамо»га бошқа клубларда тўп сураётган Самарқанд футболи тарбияланувчилари жалб этилмоқда. Шу жумладан клуб мураббийлари ва раҳбарияти мени ҳам таклиф этишганди. «Насаф»дан кетишга қарор қилгач, бир қатор клубладан таклифим бўлсада, ўзим туғилиб ўсган шаҳар жамоасига қайтишни истадим. Ҳар ҳолда ҳар бир футболчи ўз яқинлари, оиласи ва ўзи вояга етган жамоа шарафини ҳимоя қилишни хоҳлайди. Жамоага қайтишимиз ҳозирга насиб этган экан. Таркибда қатор ўзгаришлар бўлаётган бўлсада, «Динамо» клубидаги муҳит ажойиб. Футболчиларнинг кайфияти юқори. Иккинчи давра олдидан турнир жадвалидаги ҳолатни яхши деб бўлмайди. Шу боис бошланажак ўйинларга яхши тайёргарлик кўриб, натижани яхшилашга интиламиз. Самарқанд жамоаси юқори ўринларга муносиб. Вилоятимиз шаънини муносиб ҳимоя қилиш учун имконқадар ҳаракат қиламиз. Бирданига юқори натижа қайд этиб бўлмайди. Аммо ҳозирги бўлаётган ўзгаришлар секин-аста «Динамо»нинг натижалари ўсишига хизмат қилишига ишонаман» - дея фикр билдирди Илҳом Юнусов.