ЕВГЕНИЙ САФОНОВ «ДИНАМО» ЙИҒИНИДА

Рукн: Янгиликлар » Клуб хабарлари

Мамлакатимизнинг энг тажрибали дарвозабонларидан бири бўлган Евгений Сафонов бир неча йиллик хориждаги фаолиятидан кейин яна Ўзбекистонга қайтди.

Профессионал фаолиятини Тошкентнинг «Дўстлик» клубида бошлаган дарвозабон икки йиллик фаолиятидан кейин, 1999-2000 йилларда Самарқанднинг «Динамо» жамоасида тўп сурганди. Айнан «Динамо»даги фаолиятидан кейин Евгений Сафоновнинг хориждаги фаолияти бошланганди. Терма жамоамизнинг собиқ дарвозабони «Динамо»дан Ярославлнинг «Шинник» клубига йўл олганди. «Шинник» сафидаги олти йиллик фаолиятидан сўнг эса, Россия биринчи дивизионида иштирок этувчи «Урал» клубида бир йил тўп сурди. Кейинчалик эса «Рязань», Қозоғистоннинг «Мегаспорт» клубларида фаолият кўрсатди.

Ўн йиллик фаолиятдан кейин Евгений Сафонов яна Олий лигага қайтишга яқин турибди. Ҳозирда Тошкентда янги мавсумга тайёргарлик кўраётган «Динамо» сафига жамоанинг собиқ дарвозабони Евгений Сафонов келиб қўшилди. 33 ёшли тажрибали дарвозабон бош мураббий Виктор Жалилов қўл остида машғулотларга киришган. Агар футболчи мураббийлар кўригидан муваффақиятли ўта олса ва клуб билан келишувга эришса Евгений Сафонов янги мавсумдан бошлаб яна «Динамо» сафида Олий лигада тўп сура бошлайди.